ئاسایشی نەتەوەیی بەشی ٢، نووسینی سەلیم حەقیقی
ئاسایشی نەتەوەیی (national security) بەشی ٢
ڕۆڵی ڕێکخراوه هه‌واڵگرییه‌کان بۆ پاراستن و بازرگانی ده‌وڵه‌تان گرینگی تایبه‌ت به خۆی هه‌یه. هه‌بوونی زانیاریه‌كی زۆر له بواری ئابووری و نیزامی وڵاتێک له‌لایه‌ن وڵاتی ڕه‌قیبه‌وه، ده‌توانێ به‌رژه‌وه‌ندی و ئاسایشی ئابووری ئه‌و وڵاته بخاته مه‌ترسیه‌وه که به‌شێکیان بریتین له...
1. توانایی کێبرکێ
2. ڕاده‌ی سه‌رمایه گوزاری(به‌تایبه‌ت له به‌شی ده‌ره‌کی)
3. ڕاده‌ی چه‌ک و چۆڵ و که‌ره‌سته‌ی نیزامی
4. چۆنیه‌تی گه‌شه‌ی ئابووری و نیزامی
5. توانایی به‌رهه‌م هێنانی ئابووری و نیزامی
6. خاڵه به هێز و لاوازه‌کانی ئه‌م دوو چه‌مکه
هه‌ر بۆیه کۆ کردنه‌وه‌ی زانیاری له‌م بوارانه دا بابه‌تێکی گرینگ و پڕ نهێنییه که ئه‌گه‌ر بکه‌وێته ده‌ستی دژبه‌ر، ئه‌وا په‌تت وه‌سه‌ر ئاو ده‌که‌وێ! کاتێک شه‌ڕێ ئێران و عێراق ده‌ست پێده‌کات، بۆ ماوه‌ی هه‌شت ساڵان عه‌مباره‌کانی دراوی ڕۆژئاواییه‌کان به تایبه‌ت ئیسرائیل و ئه‌مریکا پڕ ده‌بن له دۆڵار، له ئاکامی ئه‌و شه‌ڕه‌دا سه‌دان ملیارد دۆڵار قازانج وه‌ده‌ست ئیسرائیل ده‌که‌وێ که هه‌موو کاروباری بازرگانی به چه‌ک و چۆڵه‌کان له‌لاین سرویسه سیخوری و هه‌واڵگرییه‌کان ده‌کران، ئه‌وان بوون توانیان خزمه‌تێکی باش بکه‌ن به ئابووری وڵاتانی خۆیان و به فرۆشتنی که‌ره‌سته‌ی نیزامی کۆنه و قۆڕازه به ڕێژیمی ئێران وه‌ک مانگا بیدۆشن و شیری لێ بگرن!. نمونه‌یه‌کی تر و هه‌ره به‌رچاو ئه‌و گه‌ماڕۆیانه‌ی سه‌ر ڕێژیمی کۆماری ئیسلامی ئێرانه، هه‌واڵگرییه‌کانی وڵاتانی دژی ڕێژیمی ئێران به تایبه‌تی CIA و MOSAD وه‌ها چوونه‌ته ناو ڕه‌گ و بناوانی ده‌زگا جۆراوجۆره‌کانی ڕێژیمی ئێران که ته‌نانه‌ت ده‌رفه‌تی ئه‌وه‌شیان پێنادرێ بیر له ڕێگایه‌ک بکه‌نه‌وه که خۆ له‌و گه‌ماڕۆیان ده‌رباز بکه‌ن و به نهێنی و به قه‌ولی خۆیان ده‌وریان لێده‌نه‌وه، خێرا به زانیاری ته‌واوه وه، پیلانه‌که‌یان ئاشکرا ده‌بێ و له داو ده‌که‌ون، نه‌وت هه‌ڵگری "گریسی 1" کاتێک ده‌خوازێ زیاتر له دوو ملیۆن به‌رمیل نه‌وت بگوازێته‌وه و هیچ که‌س جگه له به‌رپرسانی به‌رزی وزاره‌تی نه‌وت و ده‌زگای زانیاری ئاگاداری ئه‌و جووڵه‌یه نین، له ده‌ربه‌ندی "جه‌به‌ڵوتارق" ده‌ستی به‌سه‌ر داده‌گیرێ!، ئه‌مه یانی کاره‌سات له‌ناو سیسته‌می ئیداری و هه‌واڵگری ئێران ڕوویداوه و به‌سه‌ر یه‌ک دا ڕووخاوه.
کاتێک که بنیامین نتانهایۆ له ساڵی 2018 له حه‌فتاوسێهه‌مین دانیشتنی گشتی ڕێکخراوی نه‌ته‌وه‌یه‌کگرتووه‌کان باس له "قالی شووییه‌ک" ده‌کا له "تورقوزئاباد" (نزیک تاران) و گوتی ئه‌م شوێنه که زۆرتر وه که‌لاوه‌یه‌کی چۆڵ و فه‌رش شۆریه‌ک ده‌چێ، جێگای کۆ کردنه‌وه‌ی ئۆرانیۆمه، به‌رپرسانی باڵای ئه‌و ڕێژیمه به‌تایبه‌ت ده‌زگای دیپلۆماسی ده‌ره‌وه به تانه وته‌شه‌ر پێده‌که‌نین و گاڵته‌یان ده‌هات، به‌ڵام ئه‌و ماوه‌یه ده‌رکه‌وت که قسه‌ی نتانیاهۆ ڕاست ده‌رچووه و ئه‌وه پشکێنه‌رانی ئاژانسی وزه‌ی ناوه‌کی؛ خڵت و شوێنه‌واری ئه‌م ماکه‌یان له‌وێ دۆزیویته‌وه. ئه‌وه به واتای ئه‌مه‌یه که هه‌واڵگرییه‌کانی ئیسرائیل و ئه‌مریکا زۆر باشتر له جه‌نابی وه‌زیری ده‌ره‌وه و به‌شێکی زۆر له کاربه‌ده‌ستانی به‌رزی ئێرانی ئاگاداری کاروباری نهێنی ئه‌و وڵاته‌ن!
ده‌زگا نهێنی و سیخورییه‌کانی ئیسرائیل و ئه‌مریکا وه‌ها ڕۆچوونه‌ته ناو سیستمی سیاسی، ئابووری و نیزامی ئه‌م وڵاته، که ئێستا هه‌موولایه‌ک له یه‌کتر وه‌شک که‌وتوون و ڕۆژانه ده‌بینین به ناو و پاساوی جۆراوجۆره‌وه که‌سانی پایه به‌رزی سیاسی و ئابووری ته‌نانه‌ت نیزامی ئه‌و ڕێژیمه دیکتاتۆره ده‌گیرێن و بێ سه‌روشوێن ده‌کرێن.
ڕێکخراوه هه‌واڵگرییه‌کان ده‌توانن له ڕێگای دانی زانیاری له جێگای خۆیدا، ڕه‌وشی بازار و باقی به‌شه‌کانی به‌رهه‌م هێنان و بازرگانی و بازاری دراوی ئه‌و وڵاته‌ی که مه‌به‌ستیانه کۆنترۆڵ بکه‌ن، نمونه‌یه‌کی تربازاری ئاڵۆز و شپڕێوی دۆلار له ئێران، به جۆرێک نرخی دۆڵار له ماوه‌یه‌کی کورت دا نزیک 200% زیادی کردووه، ته‌نانه‌ت ده‌زگا هه‌واڵگرییه‌کانی ئاماژه پێکراو ڕۆڵیان له ژن و ژن خوازی و دانی مه‌دره‌کی ئاکادێمی و به‌خشینی پووڵ و پاره به بنه‌ماڵه‌ی به‌رپرسانی پله‌ی یه‌کی ئێرانی چ له ده‌ره‌وه چ له ناوخۆ هه‌یه. ئێستا سیستمی گه‌نده‌ڵی ئێران وه‌ک مشکی ئازمایشگایی لێ هاتووه بۆ ده‌زگای سیخوری و ئاسایشی ئه‌مریکا و ئیسرائیل!
به‌شێک له شاره‌زایان له‌سه‌ر ئه‌م باوه‌ڕه‌ن له‌گه‌ڵ ئه‌وه‌یکه دوای شه‌ڕی سارد، له ڕاده‌ی کێبرکێی که‌ره‌سته‌ی نیزامی که‌م کراوه‌ته‌وه به‌ڵام مۆدێڵی شه‌ڕه‌کان ئاڵووگۆڕیان به‌سه‌ر داهاتووه و شه‌ڕی نه‌رم و ئابووری و سیخوری ئێستا له بوورس دان. به‌ستێنی چالاکیه‌کانی سیخوری و جاسووسی نه‌ک هه‌ر به ته‌نیا پرس گه‌لێكی نیزامی و سیاسییه به‌ڵکوو بابه‌تی وه‌ک کۆمپانیا تایبه‌ته‌کان(كه‌سی)، نهێنی بازرگانی و ئابووری، گه‌شه و پێشکه‌وتنه پیشه‌ییه‌کان به تایبه‌ت له که‌رتی کۆمپیوته‌ر و ئینتێرنێت دا و...هتد . "بووزمه‌ن" له‌سه‌ر ئه‌و باوه‌ره‌یه، ئیتر ده‌وڵه‌ته‌کان له جیهان دا ته‌نیا بڕیاڕده‌رانی کایه‌ی سیاسه‌ت نین و ڕاده‌ی بڕیارده‌رانی ناحکومی وه‌ک گروپه ئه‌وپه‌ر نه‌ته‌وه‌ییه‌کان(فره نه‌ته‌وه‌یی )، ڕێکخراوه‌کانی ئابووری نێوده‌وڵه‌تی و ناحکومی و ... زیادیان کردووه، ئه‌و پێێ وایه، وێڕای ئه‌و هه‌مووه ڵێڵی و ڕووداوه راستیانه‌ی ژینگه‌ی جیهانی بۆ ئاڵووگۆڕی سیاسه‌تی ده‌ره‌کی سه‌ربه‌خۆ و به‌هێز، حکومه‌ته‌کان ناچاران له هاوڕێیانی خۆیان له ده‌زگا سیخوری و هه‌واڵگرییه‌کان که‌ڵک وه‌رگرن.
ئه‌وه‌ی گرینگه ئه‌مه‌یه که ڕێکخراوه‌کانی هه‌واڵگری بتوانن به ده‌ست وێڕاگه‌یشتن به زانیاری و به‌که‌ڵک وه‌رگرتن له هێزی شرۆڤه و شه‌ن کردن و پێشبینی ڕاست و دروست، به‌ستێنێکی له‌بار بۆ بڕیاردانێکی ئاوه‌زمه‌ندانه بۆ سیاسه‌تمه‌داره‌کان ئاماده بکه‌ن.
له قۆناغی ئێستادا زۆر که‌س له خه‌ڵکی ڕه‌شۆکی و بازاری، به‌رده‌وام ئه‌م پرسیاره دووپات ده‌که‌نه‌وه، ئه‌دی بۆ ئه‌مریکا لێی نادا؟؟!! له نه‌ستی کۆمه‌ڵگا دا لێدان و گورز وه‌شاندنی ته‌نیا به مووشه‌ک و ساروخ و فرۆکه ده‌کرێ، ئیتر به‌شێکی زۆر له خه‌ڵک له‌وه تێناگه‌ن، له سیاسه‌تی ژووره تاریکه‌کان و پشتی په‌رده‌ی ئه‌وه‌ی ئێمه ده‌بینین، شه‌ڕ ده‌مێکه ده‌ستی پێکردووه و ته‌نانه‌ت ڕێژیمی توتالیته‌ری ئیسلامی ئێران، به چۆک داهاتووه و هه‌ر ته‌نیا ڕواڵه‌ت و قاپێلکه‌که‌ی ماوه، ئه‌و هه‌مووه په‌له‌قاژه‌یه‌ی ده‌شیکه‌ن هێمای له گیانه‌ڵڵا دابوونیه‌تی! به‌ڵام مه‌خابن ڕه‌وتی ئۆپۆزسیۆنی دژبه‌ری کۆماری ئیسلامی ئێران به گشتی و به‌تایبه‌تی کورد، هێشتا خۆیان له گه‌مه‌ی ئاسایشی نه‌ته‌وه‌یی و نێونه‌ته‌وه‌یی نه‌دۆزیویته‌وه و به‌داخه‌وه له‌م سۆنگه‌یه‌وه هیچ کارێکیان هه‌تا ئێستا له ده‌ست نه‌هاتووه. نه‌بوونی سیستمێکی نهێنی سیخوری و ئاسایشی، نه‌بوونی پێكهاته‌یه‌كی به‌هێز و ڕێک و پێک و به به‌رنامه، گرینگی نه‌دان به پرسی ئابووری و شه‌ڕی نه‌رم و فه‌زای سایبێری، ونبوونی پارتنێر و لۆبی و... وایکردووه له پشکدار بوونی به ڕۆژی، شه‌ڕ له‌گه‌ڵ ئێران به‌و فاکته‌ڕانه‌ی باسمان کرد، وه‌دوا که‌ون. ته‌نانه‌ت باشووری کوردستانیش تووشی ئه‌م سه‌رلێشێواوی و ئاڵۆزییه بووه، له‌گه‌ڵ ئه‌وه‌یکه هه‌رێمی کوردستان به نیسبه‌ت به‌شه‌کانی تری کوردستان(هه‌ڵبه‌ت به‌و ئیمکاناته باشانه‌ی که هه‌یه‌تی و وه‌ک حکومه‌تێک هه‌ڵسووکه‌وت ده‌کات) به ڕواڵه‌ت ده‌زگای زانیارای و سیخوری هه‌یه به‌ڵام کارکردی ئه‌م ناوه‌ندانه ته‌نیا مه‌سره‌فی ناوخۆیی هه‌یه و هه‌ر بۆ خه‌ڵکی کورد کاری پێکراوه. خۆ تێهاویشتن ده گۆمی هاوکێشه سیاسیه‌کان و چوونه ژووره تاریکه‌کان، پێویسته به زانستی ئاسایشی نێونه‌ته‌وه‌ی هه‌یه. کورد ده‌بێ باش ئاگاداری، کارکرد، تایبه‌تمه‌ندییه‌کان، چۆنیه‌تی گۆران و ئاڵووگۆڕه‌کان، دانوستاندنه‌کان و …هتد بێت ده‌نا له‌م ده‌رفه‌ته‌ی بۆی ڕه‌خساوه له سیاسیه‌تی نێوده‌وڵه‌تی دا سه‌ری بێ کڵاو ده‌مێنێته‌وه.
0 لێدوانەکان
Karla Gleichauf
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
M Shyamalan
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment
Liz Montano
12 May 2017 at 05:28 pm
On the other hand, we denounce with righteous indignation and dislike men who are so beguiled and demoralized by the charms of pleasure of the moment